الجوايدة ملتقى عائلات السادة الجوايدة الأشراف
يرد الحاج عبد الهادى : وهما دول من مقامنا يا شرين دول ناس موظفين يا دوب عارفين يعيشوا انا عايز لبنتى حد غنى يريحها ويعيشها زى ما هى عايشه هنا يعنى هقولهم لا متجوش ؟ نقابلهم ونسمع منهم وانت وقتها قرر عشان منحرجهمش .
ماشى ماشى بعدين بس يالا غدونا الاول .
يوضع الطعام على السفرة ويجلس الحاج عبد الهادى وزوجته لتناول الغذاء وأشرف طالب الثانوى فى غرفته يستمع للاغانى على التليفون والتيك توك واميره تحادث صديقه لها فهم بيت كل فى حاله ويغنى على ليلاه .
اكل الحاج وزوجته ثم قال لها :بلغيهم ييجوا الجمعه بعد المغرب .
وبالفعل ابلغت شرين الحاجه ام أيمن بالموعد وهنا فى بيت الشيخ منصور ، وبعد صلاة العشاء .
يسال الاستاذ عبده والده ويستشيره من الاولى يا ابى بالذهاب هل نحن ام ام ايمن والبنات او سنكون معا؟!
يرد الشيخ منصور ويقول روح انت وام ايمن واحمد طبعا معاكم وخدوا سميرة والاء اخواته عشان يبصوا على العروسه ويتكلموا معاها وتبقوا تستفسروا منهم هيفيدوكوا برده .
يرد الاستاذ عبده: حاضر يا والدى .
الجمعة يتجة الاستاذ عبده وام ايمن وسميرة وألاء ومعهم العريس أحمد الى بيت الحج عبد الهادى ويضربون جرس الباب فتفتح لهم الشغاله ويجلسون فى صالون فاره ويتم تقديم المشروبات لهم :
اهلا وسهلا نورتونا .
تانت شرين : اهلا بيكي يا أم أميرة .
ويتبادلون عبارات الترحيب ، ثم ياتى الحاج عبد الهادى ويسلم على الحاضرين ، وبعد تبادل الحديث لفتره .
يقول الاستاذ عبده : يا حاج عبد الهادى .. طبعا انت غنى عن التعريف وتعرفنا كويس فلاداعى لأى مقدمات ، احنا جايين نطلب ايد بنتك أميرة لابننا أحمد هو فى اخر سنة فى كلية تربيه رياضيه وشغال فى جيم ومساعد مدرب فى النادى والحمد لله وفضل من الله .
يرد الحاج عبد الهادى : نورتونا يا استاذ عبده اهلا وسهلا .. يقولها باسلوب غير مريح .
وتنظر له الحاجه ام ايمن نظره ليست مريحه .
ويرتبك أحمد فى نظراته .
وهنا يقطع الاستاذ عبده هذه الجلسه وينهض واقفا ويقول .
ان شاء الله هننتظر ردك .
فتقاطعه شرين زوجة الحج عبد الهادى : لا والله ما انتم ماشيين لازم نتغدى سوا .
تبتسم ام ايمن ابتسامة خفيفه مصطنعه وتقول شكرا يا حبيبتى وابقى سلميلنا على بنتنا أميرة .
وكأن الحاجه أم أيمن تسجل موقفا خارج عن الاصول .
فمن الطبيعى ان تاتى البنت لتجلس معهم أو ان تدخل الاء وسميرة للعروسه ليروها ويتحدثون اليها ، ولكن هذا لم يحدث .
تنتهى الزيارة بنتيجة لم ترضى الاستاذ عبده ولا أم أيمن ولا حتى العريس أحمد .
وسلموا على اهل البيت وغادروا الى منزلهم فى قرية الشيخ منصور وهم ينظرون لبعض ولا احد يتكلم .
وصلوا لبيتهم ، صلوا المغرب وكذلك العشاء واجتمعوا فى غرفة الجلوس مع الجد الاكبر الشيخ منصور والجده مليكة وتجمع الاربع أجيال ليدور حوار اسرى تعليمي اجتماعى دائما يحرص علية الاستاذ عبده وزوجته الحاجه أم أيمن وهو كرجل تربوى يعرف جيدا ان هذه الجلسة تساعده فى تربيه ابنائه تربيه قويمة سوية لكل من يستمع لاراء وكلمات الجد الفاضل والمربى الكبير والشيخ الجليل الشيخ منصور .
دار هذا الحوار الشاى فين يا سميرة؟
اهو جه اهه يا جدو .
جلس الجميع وقالت الحاجه أم أيمن : رحنا الزيارة يا أبا منصور وان شاء الله هيردوا علينا .
ابتسم الشيخ منصور ووجه حديثة لابنه استاذ عبده : حقيقى يا عبده؟
يا والدى الوضع مش مريح بالمرة مكنش فى اى اداب للزياره ولا استقبال بشوش .
طيب يعنى يا ولدى مكنش فى ترحيب .
تقول الاء لوالدها : يا والدى انا فعلا رجعت مش مبسوطة بس احب اعرف هنا هو كان واجب يحصل ايه ومحصلش عشان انا مش فاهمه؟
ترد الحاجه مليكة على ابنة ابنها عبده : الطبيعى استقبال بشوش وترحيب بجد دا حتى المثل بيقول (لاقينى ولا تغدينى ) والنبى بيقول ( تبسمك فى وجه أخيك صدقة ) ومن افضل الاعمال ( أن تلقى أخاك بوجة طلق ) أى بشوش كل ده واجب ان الفرد فينا يستقبل بيه ضيفه واللى جاى ليه زيارة .
يكمل الشيخ منصور ما بدأته زوجته : ويستطرد ولما اللقاء لقاء نسب ومصاهرة وزواج وبيوت ستتداخل انسابها ونصبح بيتا واحدا كان واجب الترحيب يزيد ، فمثلا يكون اهل البيت جاهزين كلهم لاستقبالكم الحاج عبد الهادى وزوجته والعروسه واخوها ، ثم بعد ذلك يدور الحوار فى وجود الكل كجلسة عائلية ووقت عرض فكرة الخطوبة هتنسحب البنت لجلب اى فاكهه او مشروب يا الاء ، بعد كده بتقعدى انت واختك سميرة مع البنت حتى لوحدكم وماما مع تانت شرين ووالدك مع الحاج عبد الهادى فى حضور أحمد اخوك ، وبعد حوارات بسيطه مش تقليدية الغرض منها ازالة حواجز نفسية والتقريب بين الاسرتين تطلبوا ايد العروسه وتمشوا على وعد بالرد قريبا انما اللى حكيتوه مختلف وله معانى كتيرة ، اهم معنى ان الاسرة مش مرحبة بالارتباط ده .
تقاطع سميرة جدها بجمله : هما يطولوا .
يبتسم الشيخ منصور : مش كده يا سميرة ، مش كده مش خناقة هى ، ده ارتباط وهما احرار زى ما انتم احرار ، وكل بيت واسرة ليها وجهه نظرها .
نظر الى احمد وقال : المهم ان العريس ميكونش زعلان قدر الله وما شاء فعل .
نظر احمد لجده وابتسم ابتسامه مصطنعة ، ولكنه لم ينطق ببنت شفه .
شوفوا يا ولاد : الحياه أقدار وعلينا كبشر نأخذ بالأسباب ونسعى ونجتهد فى إطار الشرع اللى شرعه لينا ربنا ولا نتجاوز ابدا ابدا ، ربنا يحفظكم .
وينفض المجلس على ذلك فى بيت الحاج عبد الهادى: ايه يا بابا هو انت مش عايز الناس دول ؟
يا اميرة دول ناس كحيتى محيلتهمش حاجه غيرالكلام واحنا فى زمن معاك قرش تسوى قرش قيمتك فى اللى معاك وانا عايزك تعيشى حلو ماشى يا بابا
صوت عالى لاشرف فى غرفته يحادث احد زملائة الغير منضبطين بيقوله : ايه هنعمل ايه فى حصة العربى بكره استاذ عبده ده شديد كده لازم نفكر له فى حاجه تزهقه ويسيب الفصل بتاعنا ويبعتوا لينا استاذ تانى روش كده .
ثم تدخل عليه والدته : انت مش عايش معانا يا ابنى ناس زارونا مخرجتش ولا قابلتهم وناس جم لاختك معبرتهمش ولا حتى سألت
يرد : وانا مالى ما بابا عندك اهه وصاحبة الشأن هو أنا اللى هتجوز؟!!
تتخنق الام منةكلام ابنها اشرف وتخرج من الغرفه .
