الجوايدة ملتقى عائلات السادة الجوايدة الأشراف
تعالي وهات قلمك
وكراسة رسمك
ارسم ورده تكون دبلانه
و ارسم ضحكه تكون بهتانه
و فى نص الضحكه
اكتب اسمك
اكتب نفسيتى تعبانه
ارسم جرح قديم متخيط
ارسم طفل جميل بيعيط
ارسم وش ملامحه عجوزه
لكنه شباب
و ارسم باب مقفول ع الأخر
و ارسم قلب و شال اوجاع
ارسم شله و ناس و صحاب
مبقوش حلوين
ارسم دمعه و رافضه تجف بقالها سنين
ارسم عمر لازال بيضيع على شىء مجهول
و ارسم حلم بقاله كتير على قطر وصول
ارسم لمه
ارسم عيله
و ارسم فرحه جميله بتهرب خلف السور
ارسم بيت كان زحمه لكنه صبح مهجور
ارسم قارب بقا بيميل من كتر الشيله
و ارسم حمل تقيل بيشيله دراع مكسور
ارسم ضحكه خبيثه و زور
ارسم ضلمه فى عز النور
ارسم بلدى وارضى البور
ارسم حلم
ارسم فكره
ارسم جيل مستنى الهجره
ارسم بكره بكل مشاكله
ارسم قلب و عقل فى روحك على طول مع بعض بيتشاكلو
ارسم وشك
و اضحك و انت بترسم شكله
ارسم كل كلام اتقالك
لكن خانك
ارسم نفسك وانت بتجرى فى قلب مكانك
ارسم واكتب اى كلام
و اوعاك تزعل م الأيام
طلع غلك فى الكراسه
فرغ حزنك فى الكشكول
واكتب فى الأخر بالاحمر
” انا بضحك لكن مكسور”
بقلم ـ هدى جاد الجوايدي
بنت قبيلة السادة الجوايدة الأشراف
